Poslovne vesti - Makedonija

Ќе се реконструираат 11 железнички станици

Реконструкцијата на железничката станица во Велес ќе почне во првата половина на годинава, изјави министерот за транспорт и врски Миле Јанакиески.

Министерството го очекува извештајот на Европска комисија кое треба да ги одобри потребните средства од европските фондови, за обнова на единаесет железнички станици во Македонија. Најголем дел се на коридорот 10.

- Реконструкцијата на единаесетте железнички станици ќе се изврши оваа година. Очекувам извештајот да ни биде одобрен од Европската комисија и да ги добиеме потребните средства од европските фондови. Веднаш потоа ќе започнат градежите работи. На Коридорот 10 планираме да реконструираме десет железнички станици кои се во многу лоша состојба, вели Јанакиески.

Според министерот Јанакиевски, градежните работи за реконструкција на железничката станица во Велес треба најдоцна да почнат во средината на годинава. Покрај реновирањето на објектот се предвидува и подигнување на пероните. Во модернизацијата на железничката станица ќе се вклучи и општина Велес со уредување на околината, поставување ново осветлување и изградба на зелените површини.

Инаку, освен реконструкција на велешката, со пари од европските фондови до крајот на годинава, нов лик ќе добијат и железничките станици во Прилеп, Битола, Гевгелија, Богомила, Чашка, Табановце, Демир Капија, Градско и Неготино. Ќе биде извршена реконструкција и на железничката страница во Скопје. Нејзината обнова ќе чини околу три милиони евра.